Liberdade de expresión

Neste verán de calma chicha informativa lemos unha interesante noticia en A Nosa Costa. Refírese ó acto que o próximo sábado a asociación Lumieira organiza no Pazo da Cultura ás 9 da noite, e que terá como protagonista ó xornalista de orixe galego Ramón Chao.

A conferencia ven precedida dunha certa polémica, logo de que tanto Chao coma o seu compañeiro Ignacio Ramonet fosen censurados e retirados das páxinas da Voz de Galicia, onde adoitaban a escribir artigos de opinión. Según algunhas voces, esta censura ven motivada pola marcha da dirección do xornal de Bieito Rubido, caracterizado pola súa tolerancia, e ten provocado toda clase de críticas e reaccións contra o grupo Voz, como as que puidemos ler nos últimos meses en Galicia Confidencial. Curiosamente, xa nun post anterior, nós amosabamos a nosa preocupación polas consecuencias que podería ter na liña editorial do primeiro xornal galego o cambio de timonel, que moitos relacionaban co cambio no goberno da Xunta.

De tódolos xeitos, non podemos deixar de recordar que nin Ramón Chao nin Ignacio Ramonet se caracterizan precisamente por defender a liberdade de expresión dos demais. De feito, son coñecidos pola súa defensa de réximes dictatoriais e censores coma os de Cuba ou China, e polo seu apoio a líderes como Hugo Chávez, empeñados en regular os medios de comunicación e pechar aqueles que non lles gustan. Sen embargo, como nesta bitácora defendemos aquela famosa frase de “non me gusta o que di, pero daría calquera cousa por que poidese dicilo”, felicitamos a Lumieira, e aledámonos de que Chao poida expresar as súas opinións libremente en Carballo.